Thursday 21 August 2014

அந்த ஒருவனுக்காக காத்திருத்தல்.

பேசவேண்டும்
யார் இருக்கிறீர்கள்
வெறுமையாகிப்போன தேநீர்க் கோப்பையில்
நிறைகிறது என் குரல்.

நீங்கள் எனக்காவும் பேசுவதாக இருந்தால்
தேநீர்க் கோப்பையை கவிழ்த்துவிடலாம்
என் வெற்றிடங்கள் நிறைந்து கொள்ளும்.

Tuesday 5 August 2014

வலி மூலம்...

எதிர்கொள்ளமுடியாத நடுக்கமொன்றை
சிலிர்ப்பால் கடத்தியது
வாசலில் கூடுமுடைந்து அடைந்துகிடந்த தாய்ப்புறா.

வீடும்,
நாளைய தன் குஞ்சுகளும்
நினைவுகளில் நீண்டிருக்கும்...

மரம் தேடி
நிலைகொள்ளுமொரு கிளை பார்த்து
சிறுசுள்ளி வளைத்து,
துணைகூடி வீடமைத்து இயல்பான வாழ்வென்று
இணைபுணர்ந்த நேற்றையை நினைத்திருக்கும்.